Halad Kaliwatan

Halad ngadto sa tinahud ug pinalanggang kapikas, inahan, apohan, igsoon, iyaan, ig-agaw ug higala


Mapasalamaton KAMI
sama sa kabulakan ngadto sa haring adlaw,
sa iyang mainitong bidlisiw matag sayong buntag,
ug sa iyang alindahaw nga naghatag kanamo’g kinabuhi.


SALAMAT . . . sa imong pagka tipik sa among kinabuhi;
ug sa pagtugot nga ang among kinabuhi gilalang diha kanimo.

Ikaw ang adlaw nga padayong nag-iwag sa among gilaktan;
ikaw ang bangaw nga naghatag og mabulukong kadan-ag sa among kinabuhi;
GASA KA gikan sa kahitas-an!

Kanunay kang uban kanamo sa tumang kamatinud-anon. . .
ug dayag ang imong gugma kanamo susama sa GUGMA ni KRISTO kanimo.

Ikaw ang TAKSANAN sa mga grasya nga among natagamtaman –
anaa ikaw kanunay sa mga panahon sa among kahaw-ang;
sa mga panahon sa among pakigbisug;
ug sa mga higayon sa among kalipay ug pagmaya.

Way sama KANINDOT ang imong kinabuhi
kay abli man kanunay ang imong pangisip sa pagtug-an kanamo sa kahulugan sa kinabuhi.
Ug bukas ang imong kasingkasing nga kanunay andam mosapnay ug mogakus kanamo . . ,
aron maumol ang usa ka PAMILYAng hupong sa gugma ug pagmahal sa usa’g-usa!

Busa, niining gutlo sa pagpasalamat, tuguti’ng kining mga pulong nga natagik,
mahulma’ng mga mainitong HALOK nga mopatik sa imong aping, sa ingon mobusilak usab sa among kasingkasing ang imong mithi, ug amo kining IKABILIN sa among mga anak ug sa anak sa atong KALIWATAN.

DAGHANG SALAMAT!

ni iam